Тоба авылында яшәгән, гомер көзен Ижауда кызы Филисә тәрбиясендә уздыручы Миңнур апа ХӨСӘЕНОВА 95 яшьлек олуг юбилеен каршы алды.
Аны бүген гомер бәйрәме белән район башлыгы урынбасары Ришат Нурисламов, Тирсә авыл җирлеге башлыгы Рафил Закиров котлап, бүләкләр тапшырдылар.
Гомере буе җор телле, бик тырыш, үҗәт булган Миңнур апа. Колхозда куян фермасы мөдире булып эшләгәндә ВДНХга җибәрелеп, тегү машинасы белән бүләкләнә.
Җәмәгате Зәки белән өч кыз үстерәләр. Өлкәне Зөлфирә Чүпрәле районында яши. Төпчекләре Зилә – Менделеевта. Уртанчылары Филисә гомер көзендә әниләрен үзе янына Ижауга алып китә.
Хәзер Миңнур апа урын өстендә инде. Әмма яшь чагындагы җор теллелеге, үткенлеге әле һаман да сакланып калган. Әнә, бала чакта ятлаган шигырьләрне дә сөйләп шаккатырды. Үзе язганнарын да укып күрсәтте.
Әнә шулай, кызы тәрбиясендә кадер-хөрмәттә яшәве белән бәхетле бүген Миңнур апа.