“Заводская урамы, 49нчы йорт адресы буенча ташландык өй бар. Аның тәрәзәләре ватык, агач корылмалары череп беткән. Шуңа карамастан, анда балалар уйнарга ярата. Әлеге ташландык йортны кайчан сүтәрләр микән?”
Редакциядән:
Сорауга “Әгерҗе шәһәре” муниципаль берәмлеге башкарма комитеты баш белгече Лилия ШӘРИПОВА җавап бирә:
– 2019 елда әлеге йорт хәрабә хәлендә дип танылды. Әмма бүгенге көнгә йортта яшәүчеләр таратылмаган. Йортны анда яшәүчеләрне торак бина белән тәэмин иткәннән соң гына сүтәргә ярый. Шунысын онытмагыз: торак – кагылгысыз әйбер. Хуҗасының рөхсәтеннән башка анда беркемнең дә керергә хакы юк. Шул ук вакытта торак бина хуҗалары аларның сакланышын тәэмин итә. Ата-аналарга мөрәҗәгать итеп, шуны әйтәсе килә: сез балаларның сәламәтлеге һәм иминлеге өчен генә түгел, алар кылган гамәлләр өчен дә җаваплы. Сезнең бурыч – чит йортның уен урыны түгеллеген балаларга тиешле итеп аңлату.
Элеккеге клуб бинасы куркыта
“Безнең Заводская урамында элеккеге клуб бинасы бар. Андагы әйберләрне кем ничек булдыра, шулай ташып бетерде инде. Ә кичен бирегә яшьләр җыела. Без ут чыгудан бик тә куркабыз. Район хакимияте тарафыннан бу ташландык бинаны берәр нәрсә эшләтү планлаштырыламы?”
Редакциядән:
“Әгерҗе шәһәре” муниципаль берәмлеге башкарма комитеты җитәкчесе Әнвәр РӘХМӘТУЛЛИН әйтүенчә, Заводская урамындагы әлеге клуб бинасын агымдагы елда реализацияләү планлаштырыла.
Тулырак: http://agryz-rt.ru/news/yashaesh/kirpichkadagy-tashlandyk-yortny-stchklr